راپۆرت- عیڕاق كارس
وەزارەتی پلاندانانی فیدراڵی جێبەجێکردنی ئیجباری ستانداردی نوێی بۆ ئۆتۆمبێلی هاوردەکراو ڕاگەیاند، کە لە سەرەتای ساڵی ٢٠٢٦ەوە کاری پێدەکرێت، بۆ مۆدێلەکان لە ساڵی ٢٠٢٥ بەدواوە. وەزارەتەکە جەختی لەوە کردەوە کە ئامانج لەم ڕێکارانە ڕێکخستنی هاوردەکردنی ئۆتۆمبێل و باشترکردنی ستانداردەکانی سەلامەتی و کوالیتی و پاراستنی بەکاربەران.
سەبارەت بە هەرێمی کوردستان، داتای فەرمیی بەردەست ئاماژە بە هەماهەنگی نێوان حکومەتی فیدراڵی و حکومەتی هەرێم دەکات بۆ ستانداردکردنی ڕێکارەکان و تایبەتمەندییەکان و پشکنینەکان بۆ کاڵا هاوردەکراوەکان. بەڵام تا ئێستا ئەو سەرچاوە فەرمییانەی ڕاوێژیان پێکراوە ڕوونکردنەوەیەکی ڕوونیان لەبارەی میکانیزمی جێبەجێکردنی ستانداردە نوێیەکان لەسەر ئەو ئۆتۆمبێلانەی لە ڕێگەی دەروازەکانی هاتنە ژوورەوەی هەرێمەوە هاوردە دەکرێن، نەخستۆتەڕوو.
وەزارەتی پلاندانان پێشتر ڕایگەیاندبوو کە ستانداردەکان لە ساڵی ٢٠٢٥ بەدواوە بۆ ئۆتۆمبێلی هاوردەکراو کارپێدەکرێت، ڕوونیشیکردەوە کە تایبەتمەندییەکان جۆرە جیاوازەکانی ئۆتۆمبێل دەگرێتەوە، لەکاتێکدا هێشتا پێداویستییە تەکنیکییەکان بۆ ئۆتۆمبێلی کارەبایی و هایبرید پەرەپێدەدرێت.
لە هەنگاوێکی پەیوەندیداردا، ڕێکخراوی ناوەندی بۆ ستانداردکردن و کۆنترۆڵکردنی کوالیتی لە ساڵی ٢٠٢٦دا خزمەتگوزارییەکی ئەلیکترۆنی دەستپێکرد بۆ دەرکردنی بڕوانامەی یەکسانبوون بۆ ئۆتۆمبێلی نوێی هاوردەکراو. ئەمەش ڕێگە بە هاوردەکاران دەدات کە داواکاری پێشکەش بکەن و ڕێکارەکانی مامەڵەکردن بە شێوەیەکی ئەلیکترۆنی لە ڕێگەی پلاتفۆرمی “Aur”ەوە تەواو بکەن، بە ئامانجی کەمکردنەوەی کاغەزەکان و خێراکردنی مامەڵەی هاوردەکردن.
هەروەها دەسەڵاتدارانی حکوومی ڕایانگەیاند، باجی گومرگی نوێ کە لە سەرەتای ساڵی 2026 جێبەجێ کراوە، ئۆتۆمبێلیش وەک کەلوپەلی لوکس لەخۆ دەگرێت، هاوکات تایبەتمەندییە ئیجبارییەکانی عێراق بۆ ئۆتۆمبێلی هاوردەکراو تا ئێستاش بە جێبەجێ ماون.
ئەم ڕێوشوێنانە لە کاتێکدایە کە بازاڕی عێراق شاهیدی زیادبوونی هەمەجۆریی ئۆتۆمبێلە هاوردەکراوەکانە، بەتایبەتی لەگەڵ هێنانەکایەی مارکە و مۆدێلی نوێ. ئەمەش وا دەکات کە یەکسانی ئۆتۆمبێل بە مەرجە تەکنیکییەکانی عێراق ببێتە هۆکارێکی بنەڕەتی لە پرۆسەی هاوردەکردن و تۆمارکردندا.
بڕیارە جێبەجێکردنی تایبەتمەندییە نوێیەکان کاریگەری لەسەر کۆمپانیاکانی هاوردەکردن، بریکارەکانی ئۆتۆمبێل، و بەکاربەران هەبێت، بەتایبەتی سەبارەت بەو ئۆتۆمبێلانەی کە بۆ یەکەمجار دەچنە ناو بازاڕی عێراق و پابەندبوونیان بە مەرجە تەکنیکییە پەسەندکراوەکان.
تێبینی: تایبەتمەندییەکانی ئۆتۆماتیکی بە مانای دابەزین یان بەرزبوونەوەی نرخی ئۆتۆمبێل نییە. وەزارەتی پلاندانان دووپاتی کردەوە کە ئامانج لە تایبەتمەندییەکان ڕێکخستنی هاوردە و باشترکردنی کوالێتی و سەلامەتییە، نەک دانانی نرخی ئۆتۆمبێل.
